Ambasada Turke në Tiranë, pohon se deri tani sipërmarrja turke, në Shqipëri ka marrë përsipër realizimin e 19 projekte në fushën e ekonomisë me vlerë totale prej 500 milionë USD. Nga këto 11 milionë USD janë realizuar brenda vitit 2008. Ndër investimet më të rëndësishme të rreth 60 bizneseve turke në vendin tonë, janë në fushën e metalurgjisë, minierave, telekomunikacionit dhe atë bankar.
Ambasada Turke në Tiranë në bashkëpunim me “Albinvest”, organizuan hapjen e Forumit të biznesit shqiptaro-turk. Një grup biznesmenësh nga Turqia, që u përkasin kryesisht sektorit prodhues, paraqitën profilet e bizneseve të tyre, së bashku me dëshirën për të hyrë me investime në Shqipëri.
Në këtë forum merrnin pjesë dhe përfaqësues të firmave dhe kompanive të njohura shqiptare, të cilët diskutuan me homologët e tyre për krijimin e mekanizmave të shërbimeve të sipërmarrjes dhe të konsulencës teknike midis dy vendeve.
