Instituti Italian i Kulturës publikon rezultatet për 927 kandidatët. Testimi i dytë për marrjen e certifikatës “Celi 3” do të zhvillohet më 6 mars

Dalin rezultatet e provimit për marrjen e certifikatës së njohjes së gjuhës italiane “Celi 3”, për 927 kandidatët që i janë nënshtruar këtij testimi në datën 23 nëntor 2009. Instituti Italian i Kulturës në Tiranë ka publikuar dje zyrtarisht rezultatet e këtij provimi, falë të cilave do të procedohet më tej për pajisjen e kandidatëve me certifikatën “Celi 3”. Provimi për certifikatën e gjuhës italiane “Celi 3 e 5”, lëshuar nga Università per Stranieri di Perugia (Universiteti për të Huajt në Peruxhia) organizohet nga Instituti Italian i Kulturës në Tiranë, e cila shërben edhe për të bërë kërkesën për pararegjistrim në universitetet italiane.
Testimi i dytë
Testimi i dytë për marrjen e certifikatës “Celi 3” do të zhvillohet më 6 mars të vitit 2010. Për këtë, Instituti Italian i Kulturës në Tiranë ka nxjerr afatet e regjistrimit, për t’iu nënshtruar provimit të gjuhës italiane në mars të këtij viti. Kështu, sipas afateve të vendosura, kandidatët që nuk e kanë dhënë në fazën e parë të testimit provimin marrjes së certifikatës “Celi 3”, që u zhvillua në datën 23 nëntor, do t’i nënshtrohen këtij provimi më 6 mars të vitit 2010. Për këtë arsye, këta kandidatë duhet të regjistrohen deri në datën 19 janar të këtij muaji në Institutin Italian, për t’u futur në provimin e marsit. Po ashtu, në këtë provim, mund të marrin pjesë edhe kandidatët që nuk e kanë marrë certifikatën “Celi 3” në provimin e zhvilluar më 6 mars të vitit 2009.
Kandidatët
Instituti Italian i Kulturës në Tiranë ka përcaktuar edhe kandidatët për student në Itali , që kanë të drejtë të futen në provimin e 6 marsit 2010. Sipas njoftimit zyrtar, kanë të drejtë të regjistrohen për provimin e marsit, të gjithë studentët që: kanë kaluar vetëm një provë të njohjes së gjuhës italiane me shkrim ose me gojë, në provimet e marsit dhe nëntorit 2009; zotërojnë një njohje të nivelit superior të gjuhës italiane pasi kanë tre vite që studiojnë. Instituti Italian i Kulturës rithekson se certifikata e njohjes së gjuhës italiane “Celi 3” ose ndonjë certifikatë tjetër analoge e lëshuar nga universitet italiane janë kushti kryesor për t’u pranuar kërkesa për studime në Itali gjatë vitit akademik 2010-2011. Përveç kësaj, pranimi i studentëve të huaj në universitetet italiane kryhet duke u bazuar edhe në numrin kuotave të pranimit që do të përcaktohen në shtator nga Ministria Italiane e Arsimit dhe e Universiteteve. Pajisja me Certifikatën e Njohjes së Gjuhës italiane – Niveli 3 (që i përket nivelit B2 i Quadro Comune Europeo di Riferimento per le Lingue) përbën një nga kushtet e preferueshme dhe të domosdoshme për t’u bërë i mundur pararegjistrimi në universitetet italiane. Marrja e provimit të gjuhës është prova e parë që duhet të kalojë një maturant për të nisur studimet në Itali.

Rregullat për provimin e 6 marsit 2010
Për pjesëmarrjen në provimin e gjuhës, çdo maturant duhet të paguajë një faturë prej 55 eurosh si taksë regjistrimi te Instituti Italian i Kulturës dhe certifikimi i gjuhës bëhet nga Universiteti për të Huajt i Peruxhia-s në Itali. Ndërsa kostoja për studentin që do të përsërisë vetëm një provë është 40 euro. Provimi i dytë për certifikatën “Celi 3” që do të zhvillohet në datën 6 mars të këtij viti do të zgjasë katër orë. Në momentin e hyrjes në provim, duhet të paraqesin: Për të rriturit: dokumentin e identifikimit ende të vlefshëm (pasaportë të firmosur, kartë identiteti ose patentën e re ). Për minorenet: dokumentin e identifikimit ende të vlefshëm (pasaportë të firmosur, certifikatë me fotografi ); laps të zi (është i ndaluar përdorimi i stilolapsit). Po ashtu, Instituti Italian i Kulturës sqaron se gjatë zhvillimit të provimit është e ndaluar futja në ambientet e provimit të çfarëdolloj materiali (libra, fletore, fjalorë etj, ) si dhe celularë.

Provimi përfshin pesë prova
1. Prova e leximit
2. Prova e shkrimit
3. Prova e linguistikës
4. Prova e dëgjimit
5. Prova e të folurit

Publikohen shpenzimet e fushatës elektorale të zgjedhjeve të 28 qershorit. Lista e partive
Partia Demokratike, Partia Socialiste dhe Lëvizja Socialiste për Integrim – kanë rezultuar të pastra kundrejt ligjit për sa i takon financimit të fushatës zgjedhore të 28 qershorit. Sipas raporteve të 26 ekspertëve kontabël pas auditimit të fondet të përftuara dhe të shpenzuara nga subjektet zgjedhore për fushatën zgjedhore, 9 subjekte zgjedhore kanë qenë korrekte me ligjin, ndërkohë që pjesa tjetër kanë pasur mangësi në dokumentacion. Konkretisht, për to Komisioni Qendror i Zgjedhjeve pritet të marrë sot masën administrative të gjobës në masën 50 mijë dhe 60 mijë lekë. Shuma e shpenzuar nga partitë politike është 366 599 376 lekë. Nga këto PD-ja ka shpenzuar për zgjedhjet 157 054 067 lekë, PS-ja 101 746 870 lekë, LSI-ja 22 889 831 lekë. Nga opinionet e audituesve vërehet se nuk ka pasur asnjë rast të refuzimit për të bërë transparent burimet e financimit të fushatës apo për të lejuar ushtrimin e kontrollit nga ana e auditit. Nga shqyrtimi i raporteve te auditimit rezultuan se disa parti politike nuk kanë respektuar dispozitat e Kodit Zgjedhor në lidhje me financimin e fushatës zgjedhore. Disa subjekte nuk kanë regjistruar në regjistrin e posaçëm të miratuar nga KQZ-ja shumën e fondeve të përftuara nga personat fizikë apo juridikë, disa nuk kanë respektuar kërkesat e parashikuar nga neni 91, pika 3 e Kodit Zgjedhor, pasi shpenzimet e bëra prej tyre për fushatën zgjedhore nuk janë dokumentuar, duke respektuar legjislacionin tatimor, ndërsa disa të tjera nuk kanë respektuar kërkesën e parashikuar në nenin 91, pika 2 të Kodit Zgjedhor, pasi nuk kanë hapur një llogari të posaçme për dhurimin e fondeve jopublike me vlerë më të madhe se 100 mijë lekë. Konkluzionet janë bërë mbi një kontroll rastësor të dokumentacionit dhe në asnjë rast nuk janë bërë kërkime shtesë në lidhje me fonde të përfituara dhe të shpenzuara. Nga 33 parti të audituara kanë përfituar fonde nga buxheti i shtetit për fushatën zgjedhore 11 parti, kanë përfituar fonde nga donatorë, persona fizikë ose juridikë 13 parti, 7 parti politike nuk kanë përfituar dhe nuk kanë shpenzuar fonde për fushatën zgjedhore. Asnjë nga partitë politike nuk ka shpenzuar më shumë se 165 733 420 lekë, 10-fishi i shumës më të madhe që një parti ka përfituar nga fondet publike.

Totali i fondeve të shpenzuara Gjoba

Partia Demokratike 157 054 067 lekë

Partia Socialiste e Shqipërisë 101 746 870 lekë

Lëvizja Socialiste për Integrim 22 889 831 lekë

Partia e të Drejtave të Mohuara e Re 15 060 000 lekë 60 mijë lekë

Partia Republikane 13 147 971 lekë 50 mijë lekë

Partia Agrare Ambientaliste 11 294 801 lekë

Partia Demokracia Sociale 10 484 816 lekë 50 mijë lekë

Partia Bashkimi për të Drejtat e Njeriut 7 708 921 lekë 50 mijë lekë

Partia Socialdemokrate 6.841.000 lekë 60 mijë lekë

Partia “G-99” 5 352 801 lekë

Partia Aleanca Demokratike 2 642 701 lekë 50 mijë lekë

Partia për Drejtësi dhe Integrim 2 518 645 lekë 60 mijë lekë

Partia Demokristiane 1 946 975 lekë 60 mijë lekë

Partia Toleranca e Re 1 252 010 lekë 60 mijë lekë

Partia e Reformave Demokratike 1 150 000 lekë 60 mijë lekë

Partia “Lëvizja e Legalitetit” 1 031 500 lekë 60 mijë lekë

Partia “Bashkimi Liberaldemokrat” 958 877 lekë

Partia “Lidhja Demokristiane” 900 000 lekë 50 mijë lekë

Partia Socialiste e Vërtetë ’91 769 800 lekë

Partia “Ligj dhe Drejtësi” 492 000 lekë 50 mijë lekë

Partia “Aleanca për Demokraci dhe Solidaritet” 452 000 lekë 60 mijë lekë

Partia “Rruga e Lirisë” 350 000 lekë

Partia “Balli Kombëtar” 220 000 lekë 50 mijë lekë

Partia “Ora e Shqipërisë” 158 090 lekë 50 mijë lekë

Partia për Mbrojtjen e të Drejtave të Emigrantëve 100 000 lekë

Partia Bashkimi Demokrat Shqiptar 75 700 lekë 50 mijë lekë

Partia Demokracia e Re Evropiane 50 mijë lekë

Partia e Gjelbër 50 mijë lekë

Partia Lëvizja për Zhvillim Kombëtar 50 mijë lekë

Partia “Forca Albania” 50 mijë lekë

Partia Konservatore 50 mijë lekë

Partia Lëvizja për të Drejtat dhe Liritë e Njeriut 50 mijë lekë

Veprimet e qeverisë në shitjen e kompanisë ARMO tek Rezart Taçi mund të quhen një katastrofë e vërtetë ku abuzimet financiare arrijnë shifrën e 2.6 miliardë lekëve. I gjithë ky dëm i është shkaktuar buxhetit të shtetit shqiptar nga mos shlyerja e detyrimeve që kompania ARMO i ka shtetit.
Skandali më i fundit i qeverisë me Rezart Taçin është zbuluar nga Kontrolli i Lartë i Shtetit. Sipas raportit të KLSH-së për periudhën janar-shtator 2009, përgjatë gjithë vitit 2008 kompania ARMO ka akumuluar ndaj kompanisë shtetërore të naftës Albpetrol një borxh prej 2.6 miliardë lekësh. Ky borxh përbën një të tretën e të gjithë dëmit që i është shkaktuar buxhetit të shtetit. “Dëmi shkaktuar kompanisë Albpetrol sh.a ,është në vlerën 2 610 563 000 lekë, i cili përfaqëson moslikuidimin e faturave të shitjeve të produkteve nga ARMO sh.a. deri në fund të vitit 2008 dhe diferenca në çmim të këtyre shitjeve”,- citohet në raport.
Kompania ARMO është përballur së fundmi edhe me sanksione të vendosura nga Drejtoria e Rajonale e Tatimpaguesve të Mëdhenj të Fierit me arsyetimin se nuk ka shlyer detyrimet ndaj shtetit.
Odiseja e mos shlyerjes së detyrimeve që ARMO i ka Albpetrolit prej të cilit blen naftën bruto ka filluar prej kohësh. Që në momentin e privatizimi kjo kompani i ka pasur disa miliona dollarë borxh Albpetrolit. Madje drejtues të kompanisë kanë deklaruar se borxhi është shtuar edhe më shumë gjatë muajve të fundit duke u bërë shkak edhe për kriza financiare.

Midis çështjeve të shumta që janë diskutuar e vazhdojnë të diskutohen te ne lidhur me fqinjin tonë jugor, këta muajt e fundit doli në dritë edhe një problem tjetër, që për politikën aktuale shqiptare u konsiderua si një problem thjesht teknik, zgjidhja e të cilit kërkon vetëm përdorimin e kompasit. Por, a është thjesht punë kompasesh marrëveshja ende e paratifikuar nga Kuvendi Popullor?! Ato pak zëra kundër, që u dëgjuan lidhur me të, e trajtuan Marrëveshjen vetëm në pikëpamjen territoriale dhe patriotike, ndonëse me shumë të drejtë. Por, ka dhe diçka tjetër që duhet thënë lidhur me këtë rajon ujor që shtrihet midis Korfuzit dhe bregut shqiptar apo Rivierës shqiptare, siç na pëlqen që ta quajmë.

Zoti Karamanlis mbërriti në Tiranë më 29 prill të vitit 2009, menjëherë mbas vizitës që pati në Sofje të Bullgarisë më datë 27 prill të këtij viti. Midis të tjerash, atje patjetër kanë diskutuar dhe gjëra për të cilat do të merrnin vendime të rëndësishme disa kohë më vonë, dhe konkretisht në datën 16 maj të vitit 2009 në Soçi të Rusisë.
Po çfarë ndodhi në Soçi? Në Soçi u morën vendime shumë të rëndësishme lidhur me të ardhmen energjetike të Europës. “Gazprom”-i rus nënshkroi një paketë dokumentesh për realizimin e gazsjellësit “South Stream”, me holldingun bullgar të energjisë, me kompaninë greke “DESFA” dhe me kompaninë serbe “Serbijagaz”, për bashkëpunim në ndërtimin e tubacioneve për transit të gazit nëpër territoret e Bullgarisë, Serbisë dhe Greqisë dhe më pas, me destinacion Europën Perëndimore.

Një ditë para nënshkrimit të marrëveshjeve të mësipërme, në takimin Putin – Berluskoni, kompania italiane “Eni” arriti marrëveshje për rritjen e kapacitetit përcjellës të “South Stream” nga 31 në 63 miliardë metra kub gaz në vit. Gjithë kjo sasi gazi do të kalojë nga Greqia për në Itali; sigurisht me një tubacion nënujor që patjetër kalon midis Korfuzit dhe bregdetit shqiptar. Me sa duket, kjo është dhe arsyeja e ngutjes greke për sanksionimin e kufirit detar midis nesh. Një ngutje që nuk ka se si të mos na sjellë në mendje zvarritjet e problemeve që rrinë pezull prej shumë kohësh midis Shqipërisë dhe Greqisë.

Këtu dalin edhe disa pyetje, për të cilat specialistët tanë të fushave duhet të na japin përgjigje!
1. Ky tubacion gazi që do të furnizojë me gaz gjysmën e Europës, a ka ndonjë ndikim negativ në ambientin e bregdetit tonë jugor, në të cilin ne po investojmë për turizëm djersën dhe mundin e shumë viteve pune dhe emigracioni?
2. Ky tubacion, si pozicionohet me kufirin tonë detar të vjetër dhe me atë të ri? Do të jetë brenda, apo jashtë, sa afër ujërave tona territoriale?
3. A ka përfitime financiare apo të ndonjë natyre tjetër Shqipëria nga ky projekt që mundohet të na nxjerrë jashtë skemave të furnizimit me gaz? Kemi apo s’kemi pozicion strategjik?
Për të pasur një ide se çfarë përfitimesh do të kenë vendet e tjera që do të jenë pjesë e këtij transitimi po japim disa të dhëna të vogla. Turqia i kërkon Rusisë për këtë gazsjellës që do kalojë në Shelfin e saj verior, në Detin e Zi, ndërtimin, nga pala ruse, e një centrali bërthamor me tre reaktorë të një fuqie të madhe dhe një degëzim të gazsjellësit që ta përshkojë Turqinë Qendrore nga veriu në jug e të dalë në Detin Mesdhe, për të vazhduar drejt Izraelit. Jo pak, por Rusët janë gati që ta bëjnë këtë.
Bullgaria, përveç përfitimeve të tjera, vetëm taksë vjetore transiti do të përfitojë rreth 30 milionë dollarë në vit.
Në Bullgari, ky gazsjellës degëzohet në dy degë; njëra degë merr Veriun, nëpër Serbi, – drejt Europës Qendrore, kurse tjetra në Jug, – drejt Greqisë. Gazsjellësi në fjalë u shërben interesave ruse për politikën e tyre energjetike. Ai është konkurrent i “Nabuço”-s, që është varianti perëndimor, i mbështetur fuqishëm edhe nga SHBA, për furnizimin me gaz të Europës nga Azia Qendrore, Azerbajxhani, Irani dhe Katari.
Rivaliteti është mjaft i ashpër. Nga fundi i muajit maj të këtij viti Beogradin e vizitoi dhe zëvendëspresidenti amerikan, Xho Bajden, i cili u bëri serbëve shumë premtime, por edhe presion në të njëjtën kohë. Vizita e tij ishte koordinuar, jo rastësisht, me takimin e 57-të të Bilderbergëve, që u mbajt në rrethinat e Athinës në Viljameni. Bilderbergët përfaqësojnë një klub të themeluar në vitin 1954, me iniciativën e familjes mbretërore holandeze, që është dhe pronare e koncernit më të madh të naftës “Royal Dutch Shell”. Ky klub kishte si qëllim fiksimin e pozicioneve të elitës së Europës dhe asaj të SHBA-ve, kurse sot punon me intensitet për Rendin e Ri Botëror.
Në takim ndodheshin 120-150 liderë të politikës botërore, anëtarë të familjeve mbretërore, klerikë, bankierë dhe manjatë të mediave. Ndodheshin aty edhe dy ish-presidentët Bush, atë e bir, sekretari amerikan i Financave, Timoti Gajtner, bankierët Zelik dhe Volfovic, Riçard Hollbruk, mbretëresha e Spanjës, ajo e Holandës etj. Veç problemeve të tjera që shqetësojnë aktualisht botën, në takim u diskutuan dhe planet energjetike ruse për Ballkanin, përfshirë këtu dhe “South Stream”. Atje u vendos t’i bëhet presion Serbisë që të heqë dorë nga nënshkrimi i marrëveshjes me “Gazprom”-in duke iu përmendur atyre se veç problemit të Kosovës, atyre mund t’u hapen probleme edhe me Vojvodinën e hungarezët që jetojnë atje. Gazsjellësi mendohet të kalojë pikërisht nëpër këtë rajon fushor drejt Hungarisë. Besoj se këto gjëra dihen nga ata shqiptarë që merren me politikë dhe që kanë mandat për të përfaqësuar interesat e këtij vendi.
Prandaj dhe përcaktimi i kufirit ujor nuk është një çështje që zgjidhet thjesht me kompas. Ky problem nuk u duhet besuar vetëm atyre që dinë të përdorin kompasin!

Komisioni Parlamentar i Ekonomisë ka miratuar sot projektligjin për kalimin e pronave të sindikatave në pronësi të shtetit. Në këtë mënyrë të gjithë kontratat që sindikatat kanë me investitorët bëhen të pavlefshme.

Në bazë të projektligjit që kalon së shpejti në Parlament shteti bëhet pronar i qindra objekteve, kryesisht ish-shtëpitë e pushimit që tashmë janë bërë hotele në të cilat investitorët kanë kryer miliona lekë investime. Në bazë të ligjit të ri, investitorët duhet të kompensohen nga sindikatat. Në shumë raste çështjet pritet të shkojnë në gjykatë. Siç dihet sindikatat nuk kanë para dhe investitorëve mund t’iu shkojnë dëm miliona lekë investime, pasi tashmë të gjitha objektet janë pronë e shtetit.

Hartuesit e këtij projektligji iu janë referuar një ligji të miratuar në vitin 1998 për të njëjtën çështje sipas të cilit, pas marrjes së pronave nën administrim, sindikatat nuk kanë të drejtë që të bëjnë tjetërsim të tyre deri në vitin 2020. Nëse të ardhurat që lëvrohen nga marrëdhënia sindikatë-investitor kalojnë në favor të shtetit, situata ndryshon në qoftë se vetë sindikata është debitore kundrejt një investitori. Në këtë rast shteti nuk njeh asnjë përgjegjësi për shkak se sipas relacionit shpjegues të projektligjit, sindikatat nuk kanë qenë pronare të ligjshme të këtyre pronave.

Nga të dhënat e ofruara nga hipoteka një pjesë e mirë e pasurisë së sindikatave janë shitur, një pjesë janë lëshuar me qira, ndërsa ka edhe prona të tjera mbi të cilat nuk është kryer asnjë veprim duke i lënë në gjendjen e fillim viteve 90-të. Nderkohe Kryeministri Berisha deklaroi kohe me pare se shteti eshte ai që do të investojë mbi to ndërsa më pas do t’ua shesë aksionet investitorëve të interesuar.

Krahas pronave që janë nën administrimin e investitorëve, një pjesë tjetër e tyre që deri në miratimin e këtij projektligji ishin nën administrimin e sindikatave do të vihen në dispozicion të fondit për kompensimin fizik të ish-pronarëve. Për identifikimin e tyre, është ngarkuar Agjencia e Inventarizimit dhe Transferimit të Pronave Publike. Ky proces duhet të përfundojë brenda tre muajve nga data e hyrjes në fuqi të këtij projektligji ndërsa për të gjithë procesin do të raportojë para Këshillit të Ministrave. Nga ana tjetër, brenda një afati kohor 60 ditë nga marrja e të dhënave, qeveria miraton fondin e pronave të paluajtshme të cilat vihen në dispozicion për kompensim fizik ndaj pronarëve sipas ligjit nr.9235, datë 29.07.2004, “Për kthimin dhe kompensimin e pronës” dhe i ve në dispozicion të Agjencisë së Kthimit dhe të Kompensimit të Pronave.

Kombet e Bashkuara prezantojnë Raportin Botëror të Investimeve 2009

Ndër gjithë ekonomitë në tranzicion, Shqipëria mban rekord për thithjen e investimeve të huaja. Ky është përfundimi i Raportit Botëror të Investimeve 2009, i prezantuar nga Kombet e Bashkuara në Shqipëri. Raporti, i përgatitur çdo vit nga Konferenca e OKB-së për Tregtinë dhe Zhvillimin (UNCTAD), këtë vit fokusohet te tendencat e investimeve të huaja, para dhe gjatë krizës ekonomike, gjithashtu edhe mbi rolin e rëndësishëm që këto investime mund të kenë në rritjen e prodhimit bujqësor. Ekspertët që kanë marrë në analizë shifrat vlerësojnë se rritja domethënëse e investimeve të huaja direkte në Shqipëri, sikurse në vendet e tjera në rajon, bazohet kryesisht në “privatizimin e kompanive të mëdha që më parë ishin në pronësi të shtetit dhe përmirësimin e mjedisit të biznesit”. Sfida më e rëndësishme për Shqipërinë dhe vendet e rajonit është e ardhmja e këtyre privatizimeve në rritjen e vendeve të punës dhe performancës së vendit.

Raporti

Raporti u bë publik nga zyra e Koordinatores së Agjencive të Kombeve të Bashkuara në Shqipëri. “Në Evropën Juglindore, Shqipëria dhe Mali i Zi kanë pasur një zhvillim pozitiv sa i përket investimeve të huaja direkte vetëm në vitin 2008 përkundrejt vitit 2007. Krahasuar me ekonomitë në tranzicion në mbarë botën, Shqipëria mban rekord, pas Armenisë, në rritjen e IHD-së në vitin 2008, duke shënuar 45 për qind rritje në investimet e huaja direkte”,- theksohet në raport. Rrjedha e investimeve të huaja direkte është prekur rëndë në mbarë botën nga kriza ekonomike, sipas tij. Rrjedha e investimeve vazhdon të bjerë përgjatë gjithë rajoneve, nga niveli më i lartë, 2 trilionë dollarë në vitin 2007, në 1.7 trilionë në vitin 2008, në 1.2 trilionë në vitin 2009. Pritet një rigjenerim i ngadaltë në vitin 2010 me një arritje maksimale në vitin 2011. Kriza ka ndryshuar tablonë e investimeve: në vitin 2008, ekonomitë në zhvillim dhe në tranzicion rritën aksionet e tyre në rrjedhat botërore të investimeve me 43 për qind, ndërkohë që investimet në vendet e zhvilluara dhe nga këto vende pësuan rënie. “Reformat e fundit të qeverisë, si privatizimi i ndërmarrjeve shtetërore, synuan tërheqjen e investimeve të huaja dhe kanë ndihmuar Shqipërinë të arrijë një nivel të lartë të shifrave të IHD-së në vitin 2008”, – është shprehur Gulden Turkoz-Cosslett, koordinatorja e përhershme e Kombeve të Bashkuara në Shqipëri dhe përfaqësuesja e përhershme e PNUD-it.

Sfidat

Koordinatorja e përhershme e Kombeve të Bashkuara në Shqipëri dhe përfaqësuesja e përhershme e PNUD-it ka bërë të ditur se sfida përpara ka të bëjë me mbajtjen e një niveli të qëndrueshëm rritjeje të IHD-së me anë të politikave të drejta dhe krijimit të një mjedisi të përshtatshëm. “Kombet e Bashkuara do të vazhdojnë të mbështesin qeverinë në përpjekjet e saj për të krijuar një mjedis të përshtatshëm për rritjen e qëndrueshme të IHD-së në vend”, – tha ajo.

Bilanci i pagesave

Sipas Bankës së Shqipërisë, bilanci i përgjithshëm i pagesave për tremujorin e dytë të 2009-s rezultoi në rritje të mjeteve valutore me 142 milionë euro. Tremujori i dytë u mbyll me një deficit të llogarisë korente prej 360 milionë eurosh. Në krahasim me tremujorin e dytë të 2008-s, deficiti u zvogëlua me rreth 3 milionë euro, nga 363 milionë euro. Flukset hyrëse të kapitalit regjistruan vlerën 434 milionë euro, duke tejkaluar dhe financuar plotësisht deficitin korent.

Kur flitet për Brabusin, pak a shumë dihet se çfarë ndodhë. Kësaj radhë bëhet fjalë për modelin “Black Baron” (Baroni i Zi) të bazuar në klasën aktuale E-Class.

Me volum prej V12 dhe 6.3 litrash Baroni i Zi ka në dispozicion hiq më pak se 800 kuaj fuqi dhe momentin maksimal të rrotullimit të atypëratyshëm prej 1.100 Nm, ndryshe të kufizuar në mënyrë elektronike, sepse motori në fakt arrin momentin maksimal të rrotullimit prej 1.420 Nm!

Natyrisht, me sistem të përshtatur të amortizimit dhe aty janë edhe frenat e përmirësuara e boshtet më të mëdha. Aerodinamika e automjetit është përmirësuar, derisa shpejtësia maksimale po ashtu në mënyrë elektronike është kufizuar në 350 kilometra në orë.

Për ata të cilët do të vendosin ta largojnë kufizimin, do të mund të përjetojnë një përvojë të papërshkrueshme, sepse Baroni i Zi mund të arrijë shpejtësinë prej 370 kilometra në orë.

Çmimi i këtij automjeti fenomenal është hiq më pak se 600.000 euro.

Më datë 18 shtator, në ambientet e Bankës së Shqipërisë do të zhvillohet ankandi i radhës për shitjen e bonove të thesarit. Burime nga Departamenti i Politikave Monetare pranë kësaj banke bëjnë të ditur se në shitje do të nxirren bono thesari me maturim 6-mujore dhe 12-mujore kundrejt një vlere të përgjithshme prej 12.1 miliardë lekësh. Bonot e thesarit dhe obligacionet janë instrumente borxhi, nëpërmjet të cilave qeveria merr hua nga publiku dhe siguron të ardhurat e nevojshme për të financuar shpenzimet që nuk i mbulon dot nga të ardhurat. Aktualisht, qeveria shqiptare emeton dy lloje letrash me vlerë: bono thesari dhe obligacione. Bonot e thesarit tregtohen për periudha 3, 6 dhe 12-mujore, ndërsa obligacionet kanë periudha maturimi më të gjata 2, 3 dhe 5-vjeçare. Rritja e vazhdueshme e interesave të bonove të thesarit dhe obligacioneve kohët e fundit paraqitet si një mundësi e re edhe për individët. Investimi në bono thesari 1-vjeçare, 6-mujore apo 3-mujore për individët sjell interesa në disa raste dy herë më të larta se depozitat e vendosura në pjesën më të madhe të bankave të nivelit të dytë. Duke qenë se janë detyrim i drejtpërdrejtë i Qeverisë, ato njihen si letra me vlerë me rrezik zero. Bonot emetohen në monedhë kombëtare lekë dhe shiten nëpërmjet ankandeve të organizuara nga BSH-ja. Në ankandin për bono thesari mund të marrë pjesë çdo individ, biznes apo bankë.

Pas Greqisë, Shqipëria ka firmosur marrëveshjen për kthimin e borxheve të vjetra për shtetet që kanë qenë pjesë e Federatës Jugosllave. Gjatë ditëve të fundit janë zhvilluar bisedimet mes Tiranës zyrtare dhe përfaqësuesve të vendeve që u krijuan pas shpërbërjes së Jugosllavisë. Mediat sllovene dhe maqedonase njoftojnë se janë firmosur edhe kontrata për ndarjen e borxhit, që arrin në total në 20.7 milionë dollarë. Sipas agjencisë shtetërore të Sllovenisë, “SRT”, borxhi që u trashëgua nga sistemi komunist do të paguhet në dollarë dhe përfshin edhe normën e interesit. E gjithë shuma do të përpjesëtohet mes Serbisë, Kroacisë, Sllovenisë, Maqedonisë, Malit të Zi dhe Kosovës. Mbyllja e bisedimeve me shtetet e ish-Jugosllavisë është pjesë e procesit të bisedimeve me të gjitha vendet që regjimi “Hoxha” u mori borxhe. Mes tyre janë edhe Kina dhe Rusia, të cilat kanë kërkuar vazhdimisht nisjen e bisedimeve për shlyerjen e parave që u morën gati gjysmë dekade më parë nga Tirana zyrtare.
Marrëveshja
Vendet që u krijuan nga ish-Jugosllavia mbyllën bisedimet 2-ditore në Tiranë, me arritjen e një marrëveshjeje në parim me Shqipërinë për shlyerjen e borxhit që i kishte ish-Federatës, në vlerë 20.7 milionë dollarë. Sipas agjencisë “SRT”: “Përfaqësuesi slloven, Rudolf Grabovec, tha se marrëveshja është arritur mbi një raport shkëmbimi 1 me 1 të shlyerjes së borxhit në dollarë dhe përqindje interesi”.
“Bisedimet ishin të suksesshme për të gjitha palët, duke pasur parasysh që secili shtet arrini në përgatitjen e një memorandumi me Shqipërinë”, – tha Gabrovec.
Bisedimet e Tiranës u mbajtën pasi Komiteti për shlyerjen e borxheve arriti në një konsensus në Sarajevë, në takimin e zhvilluar në muajin korrik, në lidhje me shpërndarjen e pasurisë financiare dhe të borxheve që i kanë Jugosllavisë 7 vendet: Shqipëria, Algjeria, Egjipti, Bullgaria, Kamboxhia, India dhe Guineja. Çështja e borxheve të trashëguara nga ndarja e ish-Jugosllavisë është një problem i ndërlikuar edhe mes vetë shteteve që dolën prej saj. Aktualisht ata janë në bisedime për ndarjen e pasurisë dhe sigurimeve shoqërore, pasi shumë prej shteteve të Jugosllavisë së dikurshme nuk përfitojnë pensione vetëm për shkak të mungesës së një marrëveshjeje mes palëve.
Shlyhet Greqia
Vetëm pak javë më parë u bë e ditur shuma prej 48 milionë dollarësh që Shqipëria duhet t’i kthejë Greqisë për borxhet që ia kishte marrë asaj në vitet 1987-1991. Vendimi është marrë në javën e dytë të dhjetorit të vitit të kaluar. Në vendim thuhej vetëm se qeveria shqiptare kishte detyrime të pashlyera ndaj shtetit grek, të krijuara gjatë sistemit komunist. Po ashtu, në vendim thuhet se detyrimet ishin konkretisht ndaj Bankës Kombëtare të Greqisë dhe Organizatës së Sigurimit të Kredive të Eksportit. Sipas Ministrisë së Financave, borxhi është marrë gjatë viteve 1987-1991, kur Shqipëria po kalonte momente të vështira ekonomike, ndërsa sistemit komunist po i vinte fundi.
Shteti ynë i kishte Bankës Kombëtare të Greqisë 7.5 milionë dollarë, ndërsa diferenca i takon Organizatës së Sigurimit të Kredive të Eksportit.
Po ashtu, buxheti i shtetit ka të trashëguar një borxh ndaj Kinës që arrin në 37,2 milionë dollarë. Pjesa më e madhe e këtyre huave janë marrë para vitit 1991, gjatë periudhës kur marrëdhëniet ekonomike mes Shqipërisë dhe Kinës ishin të lidhura ngushtë me njëra-tjetrën. Procedurat për pagimin e borxheve kanë nisur që në vitin 1993, megjithëse edhe sot nuk dihet akoma shifra e saktë e tij. Mes vendeve që shteti shqiptar ka borxhe janë edhe Rusia dhe Zvicra. Kësaj shume i bashkëngjiten edhe borxhet që Shqipëria iu ka marrë shteteve apo institucioneve financiare ndërkombëtare që nga viti 1991 dhe deri më sot. Ato arrijnë në mbi 1.3 miliardë dollarë. Nëse do ti shtojmë edhe borxhin e brendshëm, shuma arrin rreth 4.5 miliardë dollarë, një barrë e rëndë kjo për shtetin tonë të varfër.

Të dhëna statistikore për borxhin e jashtëm

Borxhi shumëpalësh: 1 miliard dollarë
Borxhi dypalësh: 413 milionë dollarë
Klubi i Parisit: 122 milionë euro
Stoku i borxhit të jashtëm: 1 miliardë e 300 milionë euro

Dypalësh: 819,586.010 USD

Greqia: 215,625.500
Italia: 168,140.280
Gjermania: 159,263.840
Japonia: 62,613.950
Kuvajti: 46,219.260
Kina: 37,260.360
Norvegjia: 26,106.740
Koreja: 27,586.690
Turqia: 20,980.640
Hungaria: 14,178.950
Çekia: 10,121.640
Zvicra: 6,663.640
Austria: 5,964.780
Rumania: 5,408.230
Sllovakia: 5,060.820
Suedia: 4,125.000
Spanja: 1,752.010
Maqedonia: 1,160.260
Polonia: 1,250.160
Bullgaria: 103.250

Ambasada Italiane publikon emrat e 526 kandidatëve për student, që duhet të fusin dokumentet për vizë. Sipas njoftimit zyrtar të kësaj ambasade, duke filluar nga data 16 korrik deri më datën e pakthyeshme të 30 korrikut 2009 studentët e poshtë shënuar mund t’i drejtohen agjencisë më të afërt të Albanian Courier–Union Net, e cila pa asnjë pagesë do të merret me dërgimin në Ambasadën Italiane në Tiranë të dokumentacionit për lëshimin e vizës për studim/universitet dhe pasaportën.
Procedura
Në vijim, pas verifikimit për plotësimin e kritereve të parashikuara nga normativa e ambasadës, kjo e fundit, do të lëshojë vizat hyrëse për studim/universitet. Pasaporta do t’u kthehet të interesuarve me anë të korrierit postar Albanian Courier, bashkë me dokumentacionin që studentët duhet të paraqesin në origjinal pranë universitetit në Itali (Dëftesën e Pjekurisë dhe Certifikatën e Maturës Shtetërore të legalizuara, diplomën CELI 3, etj). Për ridorëzimin e dokumenteve studentët duhet t’i paguajnë korrierit një tarifë prej 300 lekësh (përfshirë TVSH) nëse banojnë në Tiranë, 480 lekë (përfshirë TVSH) nëse banojnë në qytete të tjera.
Afatet
Operacioni i ridorëzimit të pasaportës dhe dokumenteve të legalizuar do të kryhet nga data 18 deri më 21 gusht 2009. Në bazë të dispozitave në fuqi, vizat për studim/universitet do të jenë të vlefshme nga data 24 gusht 2009 deri më 31 janar 2010. Nuk është e nevojshme që studentët të paraqiten personalisht në ambasadë. Për të ditur zyrën e korrierit Albanian Courier–Union Net më të afërt me vendbanimin tuaj, mund të kontaktoni në numrat e telefonit 04 2357976 dhe 04 2357977 ose me e-mail albaniancourier@albaniancourier.al. Të gjithë modulet e nevojshme shpërndahen falas pranë Ambasadës Italiane dhe zyrave të Albanian Courier–Union Net si dhe mund të shkarkohen nga faqja e internetit www///.ambtirana.esteri.it

Lista e dokumenteve që duhen për lëshimin e vizës

Lista e dokumenteve që duhen për lëshimin e vizës për studim/universitet, që do të dorëzohen në agjencinë Albanian Courier–Union Net më të afërt, për tu dërguar më pas në Ambasadën Italiane në Tiranë janë si më poshtë:
Formulari për kërkesë vize, i plotësuar dhe i firmosur, ngjitur në të një fotografi për dokumente. Duhet të shënoni një numër telefoni (fiks, celular) dhe nëse keni adresë e-mail-i;
Deklaratë mbi të dhënat personale, të plotësuar me datë e firmë;
Pasaportë e vlefshme mbi tre muaj pas skadencës së vizës së kërkuar; kopje e faqes së pasaportës me të dhënat personale; kopje të faqeve me viza të tjera Shengen;
Dokumentacion për vërtetimin e vendqëndrimit në Itali. Nëse do të qëndroni pranë personave privat: deklaratë strehimi, fotokopje të dokumentit të identitetit, të firmosur të ftuesit (për shembull nëse është shtetas i huaj, lejen e qëndrimit ‘soxhornon’ ose faturat për rinovim ‘riçevutat’; nëse është shtetas italian pasaportën ose kartën e identitetit);
Siguracionin për udhëtim i vlefshëm nga data 24.08.2009 deri më 31.01.2010 (i stampuar);
Faturë bankare. Deklaratë origjinale nga një bankë italiane në Shqipëri (Banca Intesa San Paolo ose BIS Banca–Banca Italiana di Sviluppo), që vërteton derdhjen e pakthyeshme në favor të vetes të shumës 4500 euro. Banka duhet të deklarojë transferimin e kësaj depozite në filialet e saj në Itali. Pathyeshmëria e derdhjes mund të anulohet vetëm në rast se: Ambasada Italiane deklaron refuzimin e vizës; tërhiqet kërkesa për vizë nga ana e klientit, e vërtetuar kjo nga ambasada.

Studentët nën 18 vjeç
Përveç dokumentacionit të kërkuar më lart, studentët që janë nën moshën 18 vjeç bashkë me kërkesën për vizë, duhet të bashkëngjisin edhe një certifikatë familjare, të përkthyer dhe të legalizuar, dhe deklaratën noteriale për aprovim të prindërve mbi qëndrimin në Itali për studim të fëmijës, edhe kjo e përkthyer dhe e legalizuar.

Ministria e Transporteve zhvillon tenderin. Projekti në gjirin e Lalëzit

Ministria e Punëve Publike, Transportit dhe Telekomunikacionit, ka zhvilluar tenderin për “Dhënien me Koncesion të Portit të Jahteve në Gjirin e Lalëzit”, Kepi i Rodonit, Durrës. Burime zyrtare pranë ministrisë bëjnë me dije se, për këtë projekt koncesionar, u paraqit vetëm një ofertues në formën e një bashkimi të tri shoqërive. Projekti është iniciuar nga shoqëria “Ener-Alb Projects”, duke përfituar, sipas ligjit të koncesioneve dhe bonusin prej 8.2 për qind të pikëve. “Oferta e dorëzuar do të vlerësohet bazuar në kriteret e përzgjedhura të përcaktuara në dokumentacionin standard të kësaj procedure, të njohur nga subjekti konkurrues, sqaron Ministria e Transporteve. Porti i jahteve në gjirin e Lalëzit bëhet i dyti në rang vendi, pasi atij të Orikumit në Vlorë.

Komisioni i Vlerësimit të Ofertave do të përfundojë vlerësimin e ofertës së paraqitur brenda afateve dhe autoriteti do të ndjekë procedurat e parashikuara konform ligjit në fuqi. Për këtë projekt, të tri shoqëritë së bashku kanë ofruar një vlerë investimi prej 9,6 milionë euro ose 1,257,696,000 lekë. Zona ku do të ndërtohet porti vlerësohet shumë për nxitjen e turizmit, nisur dhe nga fakti se sapo ka përfunduar dhe rruga që të çon në plazhin e gjirit të Lalëzit. Ideja për ndërtimin e portit të jahteve në një zonë në afërsi të Durrësit, si dhe zhvillimi i disa fshatrave turistikë ka rritur dyfish çmimin e tokës në plazhin e shtrirë në gjirin e Lalëzit. Sipas të dhënave nga agjentët, çmimet e trojeve aty luhaten nga 100-200 euro për metër katror, nga 50 euro për metër katror që ishte çmimi minimal në këtë zonë vetëm pak muaj më parë.

Koncesioni për të ndërtuar dhe përdorur portin e jahteve do të ketë një afat prej 32 vjetësh. Porti parashikohet të jetë gati pas më pak se tre vjetësh, ndërsa për ankorimin e anijeve tarifat variojnë nga 2 deri në 250 dollarë për metër linear.

Pak javë përpara zgjedhjeve kyçe për Shqipërinë, qeveria ka miratuar në heshtje ndërtimin e atij që ndoshta mund të jetë parku eolik (për energjinë me anë të erës) më i madh në Europë.
Qeveria i ka transferuar më shumë se 97 hektarë tokë kompanisë italiane Moncada Energy përfshirë dhe një kilometër zonë mbrojtje, në të cilin nënkontraktori shqiptar Enpower Albania synon të ndërtojë një park eolik me fuqi 500 megawatt, në jug të vendit.

Një investigim i BIRN në dhjetor të vitit 2008 tregonte se projekti rrezikon të shkatërrojë një prej zonave më të paeksploruara në Europë duke lejuar ndërtimin e parkut eolik në një rezervat natyror dhe mbi territorin e një parku kombëtar.

Vendimi për të dhënë tokën dhe leja mjedisore janë të paligjshme sipas ligjeve shqiptare që synojnë mbrojtjen e rezervateve natyrore.

Grupet ambientaliste janë të tërbuara me vendimin e Ministrisë së Mjedisit për të lëshuar një leje për parkun eolik në gadishullin e Karaburunit- një park natyror- dhe një nga vendet më të bukura në gjithë Mesdheun.

Projekti përfshin ndërtimin e një linje transmetimi që do të kalojë nga porti i Vlorës për në portin italian të Brindizit.

Kablli me fuqi 400kV do të shtrihet në thellësinë 900 metra për rreth 145 kilometra dhe do të mundësojë kalimin e energjisë për në vendin fqinj. Linja e interkonjeksionit dhe parku eolik do të kenë një vlerë të përafërt prej 1.25 miliard euro. Ndërtimi pritet të nisë në vitin 2010.

Ekspertët e konsiderojnë gadishullin e Karaburunit, që ka një hapësirë prej 62 kilometrash katrorë, afër qytetit të Vlorës, së bashku me parkun e Llogarasë, si një nga parqet natyrale më të rëndësishme të Mesdheut.

Ndërsa momentalisht ajo është një rezervë natyrore, një seri studimesh sugjerojnë që e gjithë zona të kthehet në park kombëtar.

Kjo sugjerohet nga projekti MedWetCoast në vitin 2006, Plani për Veprim Strategjik për Biodiversitetin në vitin 2002, Plani për Aksion në Zonat e Bregdetit në vitin 1996 dhe një raport për aktivitetet në zonat me mbrojtje speciale që daton në vitin 1996.

Genuario Belmonte, Profesor për Biologjinë Detare në Universitetin e Salentos në jug të Italisë e përshkruan Karaburunin si një parajsë të pazbuluar.

Financim deri në 200 mijë euro dhe mbulim kostosh për bizneset që mbrojnë mjedisin

Qeveria ndryshon ligjin për ndihmën shtetërore ndaj ndërmarrjeve të vogla dhe të mesme

Bizneset e vogla në vend mund të përfitojnë ndihmë financiare nga shtetit deri në 200 mijë euro. Një ndryshim i bërë në ligjin “Për ndihmën shtetërore” parashikon mbështjetje financiare për ndërmarrjet e vogla të sapokrijuara dhe të regjistruara për herë të parë në QKR, në 12 muajt e fundit.

Një nga kushtet e përfitimit është që vlera vjetore e ndihmës nuk duhet të jetë më shumë se 33% e shumës maksimale të financimit prej 200 mijë eurosh. Ligji parashikon ndihmë për të gjitha ndërmarrjet private ose publike, përjashtuar ato që operojnë në sektorin e bujqësisë dhe peshkimit.

Ndihma

Për të përfituar nga ndihma financiare, ligji bën një klasifikim të ndërmarrjeve të vogla dhe të mesme. Në këtë grup futen ndërmarrjet, që kanë jo më shumë se 250 punonjës dhe një xhiro vjetore jo më të madhe se 40 milionë euro ose një llogari të bilancit jo më të madhe se 27 milionë euro dhe që nuk janë të zotëruara në një masë më të madhe se 25 për qind të kapitalit ose të së drejtës së votës nga një ose disa ndërmarrje, që nuk cilësohen si ndërmarrje të vogla dhe të mesme.

Për të përfituar financim nevojitet që intensiteti i ndihmës nuk duhet të kalojë 40 për qind të kostove të pranueshme për tre vitet e para pas krijimit të saj dhe 30 për qind në dy vitet pasardhëse. “Kostot e pranueshme do të jenë kostot administrative, ligjore dhe këshillimore, që lidhen drejtpërdrejt me krijimin e ndërmarrjeve të vogla, si dhe kostot operacionale për pesë vitet e para pas krijimit të ndërmarrjes.

TVSH-ja dhe tatimi mbi të ardhurat e biznesit nuk përfshihen në kostot e pranueshme”,- thuhet në ndryshimet e bëra në ligj. Nga ndihma do të përjashtohen ato ndërmarrje të vogla të kontrolluara nga aksionarë të ndërmarrjeve, që janë mbyllur gjatë 12 muajve të mëparshëm, në rast se këto janë aktive në tregun përkatës apo në tregje, të lidhura me të. Shteti do t’iu ofrojë kompanive që investojnë në burimet e rinovueshme të energjisë. Këto kompani do të ndihmohen deri në 45% të kostove.

Mbështjetja ndaj tyre do të rritet me 20 për qind për ndërmarrjet e vogla dhe me 10 për qind për ndërmarrjet e mesme. Ndërsa për bizneset që merren me riparimin e dëmeve mjedisore, duke rehabilituar zonat e ndotura, në qoftë se ndërmarrja, që ka shkaktuar ndotjen, nuk është identifikuar dhe intensiteti i ndihmës mund të arrijë deri në 100 për qind të kostove të pranueshme.

Kostot e pranueshme janë kostot për punën rregulluese, duke i zbritur rritjen e çmimit të tokës. Shteti do të marrë përsipër të paguajë edhe kostot e pagave për punonjësit me aftësi të kufizuara deri në masën 75% dhe në masën 50% për punonjësit në vështirësi.

Të shumëkërkuarit shqiptarë janë të dënuar në mungesë për vrasje, prostitucion, droge dhe grabitje me armë
Tetë shtetas shqiptarë të shumëkërkuar nga Interpol Tirana janë vënë në kërkim nga policia britanike. Lajmi bëhet i ditur nga mediat britanike, të cituara nga burimet policore, sipas të cilave Scotland Yard ka nisur një operacion për kapjen e 16 kriminelëve të rrezikshëm nga Evropa që fshihen në Britaninë e Madhe. Sipas të njëjtave burime mësohet se mes tyre janë edhe shtatë shqiptarë që kërkohen nga zyra e Interpol Tiranës. Bëhet e ditur se të kërkuarit shqiptarë janë të dënuar në mungesë për vrasje, prostitucion, droge dhe grabitje me armë. Shtetasit shqiptarë që janë vënë në kërkim janë: Durim Gremaj 35 vjeç nga Fieri i dënuar me 15 vite burg në mungese për përdhunim në vitin 2001; Agim Kabashi, 39-vjeç nga Kukësi, trafikant fëmijësh për prostitucion, (në vitin 2003 tentoi të trafikonte një vajzë në Angli); Xhevat Kaca, 33-vjeç nga Librazhdi, trafikant dhe shfrytëzues vajzash për prostitucion; Sherif Murati, 41-vjeç nga Fieri i kërkuar për vrasje në vitin 1997 dënuar me 25 vite burg; Nikollaq Naci 44-vjeç po nga Fieri trafikant droge i dënuar me 13 vite burg pasi në shtëpi ju gjetën 4 kilogramë heroinë dhe armë zjarri pa leje; Dritan Shkurti, 33-vjeç nga Kurbneshi i dënuar me 22 vite burg për vrasjen Tanush Hasanit në vitin 1998 dhe Shaqir Ziko, 28-vjeç nga fshati Prishtë i Skraparit, grabitës i një furgoni që transportonte para, i dënuar me 12 vite burg: Gentian Doda, 30 vjeç, i kërkuar për dy vrasje me motive hakmarrje. Sipas policisë angleze këta persona përveç se fshihen në Angli janë të përfshirë në aktivitete kriminale.
Operacioni
Sipas mediave britanike mësohet se organizata “Crimestopers”, ka nisur një operacion për kapjen e 16 të shumëkërkuarve në Evropë të cilët dyshohet se fshihen në territorin anglez. Sipas informacioneve të para mësohet se mes të kërkuarve bëjnë pjesë edhe 8 shtetas shqiptarë, të akuzuar për vrasje, trafik droge e prostitucioni. Më i spikaturi ndër emrat e shqiptarëve është Agim Kabashi i cili duket se drejton dhe një rrjet të prostitucionit europian. Ndërsa të kërkuarit e tjerë janë gjithashtu nga Europa lindore, nga Polonia, Hungaria, Gjeorgjia e Lituania. Operacioni “INFRA” është i pari që kryhet nga organizata e parë jo qeveritare në gjithë botën, që vihet në ndjekje të krimineleve e quajtur “Ndalimi i krimit” ose “Crimestopers”, e krijuar nga Lordi britanik Ashkroft.
Rreth 120 kriminelë të tjerë të dyshuar, të përfshirë në këtë listë fshihen në SHBA, Kanada, Xhamajkë, Holandë, Australi dhe Belgjikë. Në fakt edhe më parë është thënë se të paktën 80 vrasës shqiptarë fshihen në Britaninë e Madhe, shumica e të cilëve kanë fituar azil dhe nuk deportohen. Duket se kjo listë ka vënë nën presion sekretaren e brendshme, Xheki Smith, pasi do të shtohen kritikat ndaj dikasterit të saj. Mediat britanike që kanë botuar këto artikuj si “Independent” e “Daily Mirror” shkruajnë se si ka mundësi që kriminelë kaq të rrezikshëm hyjnë e jetojnë lirisht në Britaninë e Madhe.

Të kërkuarit shqiptarë janë:
-Durim Gremaj 35 vjeç nga Fieri i dënuar me 15 vite burg në mungese për përdhunim ne vitin 2001.
-Agim Kabashi, 39 vjeç nga Kukësi, trafikant fëmijësh. Në vitin 2003 tentoi te trafikonte një vajze ne Angli.
-Xhevat Kaca, 33 vjeç nga Librazhdi, trafikant dhe shfrytëzues vajzash për prostitucion.
-Sherif Murati, 41 vjeç nga Fieri i kërkuar për vrasje në vitin 1997 dënuar me 25 vite burg.
-Nikollaq Naci 44 vjeç nga Fieri trafikant droge, i dënuar me 13 vite burg pasi në shtëpi iu gjetën 4 kilogramë heroinë dhe armë zjarri pa leje.
-Dritan Shkurti, 33 vjeç nga Kurbneshi i Mirditës i dënuar me 22 vite burg për vrasjen -Tanush Hasanit në vitin 1998.
-Shaqir Ziko, 28 vjeç nga fshati Prishte i Skraparit, grabitës i një furgoni që trasportonte para, i dënuar me 12 vite burg.
-Gentian Doda, 30 vjec, i kërkuar për dy vrasje me motive hakmarrje

Lista e Plotë e dokumenteve që duhen dorëzuar nga kandidatët që studiojnë jashtë vendit.
Njohja e transferimit e vlefshme vetëm për vitin e plotë dhe jo sezon semestral
Kandidatët që duan të transferojnë studimet nga Universitet e Huaja drejt universitetit të Tiranës, duhet të nisin procesin e mbledhjes së dokumentacioneve të duhura pasi gjatë muajve korrik gush çelet dhe procedura e transferimit. Fillimisht aplikantët e interesuar duhet të dorëzojnë listën e dokumenteve të kërkuara nga UT, mbi bazën e të cilave do të realizohet edhe ekuivalentimi dhe përshtatja e titujve të studimit (por kjo listë duhet të dorëzohet në afatet e caktuara në të kundërt nuk merret fare parasysh kërkesa e transferimit). Burime pranë këtij universiteti kanë bërë të ditur se aplikimet për transferime gjatë vitit të ardhshëm akademik do të shoqërohen me shtesa të listës së dokumenteve, të cilat pritet të publikohen në muajin korrik të plota. Tashmë është ligjëruar me akt të posaçëm se transferimi do të bazohet në transferimin e vitit akademik dhe josemestral, ashtu siç ka ndodhur në vitet e shkuara. Kërkesat mund të paraqiten jo vetëm nga shtetasit shqiptarë që studiojnë jashtë por dhe nga shtetas të huaj që janë të interesuar të ndjekin studimet parën UT-,së në programe të caktuara.

Afatet

Lista e plotë e dokumenteve të reja që do ti bashkëngjiten listës së përdorur në vitet e shkuara do të publikohet gjatë muajit korrik. Kohë në të cilën do të iniciojë dhe dorëzimi i dosjes individuale nga çdo person të interesuar për transferimin e studimeve. Dorëzimi i dokumenteve do të pranohet pranë zyrës së protokollit në Rektoratin e UT-së për një periudhë rreth dy mujore, kohë brenda të cilës do të bëhet dhe verifikimi i të gjitha kërkesave të paraqitura mbi përputhshmërinë me programet studimore universitare. Rishikimi i këtyre kërkesave do të bëhet nga komisione të posaçme ad-hoc që funksionojnë pranë UT-së. Ky komision përbëhet prej anëtarësh të personelit akademik, të cilët do të bëjnë përzgjedhjen e kandidateve, në përputhje me kriteret e vendosura, si edhe njohjen e plotë ose të pjesshme të krediteve të fituara prej kandidatëve në programet apo vitet e studimore që kanë kryer jashtë vendit.

Lista

Lista e dokumenteve që kërkohen për transferimin e studimeve nga universitet jashtë shtetit për në atë të Tiranës për sistemin me kohë të plotë, duhet të përmbajë detyrimisht “kërkesën me shkrim e të interesuarit ( së bashku me adresën), certifikatën e lëndëve të dhëna provim me notat dhe kreditet përkatëse për secilën prej tyre (origjinale), planet dhe programet mësimore të lëndëve që ka dhënë provim (origjinale), kopje e noterizuar e indeksit të notave (librezës së notave), si dhe kopje e noterizuar e diplomës së shkollës së mesme. Dokumentet e lëshuara nga universitete e huaja duhet të jenë të nënshkruara nga titullarët e këtyre institucioneve, në të

kundërt dosja do të quhet e paplotë dhe si e tillë do të s’kualifikohet menjëherë nga procesi i shqyrtimit. Për këtë aplikim kandidatët e interesuar duhet të dorëzojnë në dosje edhe mandat arkëtimin 1000 lekë (pranë filialit të bankës që do të përcaktohet). Gjithashtu dokumentet duhen të përkthehen dhe noterizohen në Shqipëri, ndryshe nuk do të jenë të vlefshme.